Eie voer is die geheim van ekonomiese melkproduksie. Die volgende voer word deur die MOOIMELK KOEIHOTEL geproduseer of van bure binne ‘n afstand van 20 km met ‘n trekker bereikbaar, aangekoop:

1. Lusernhooi: Gebaal teen 15% voginhoud – 18% proteïen.

2. Gekerfde groen lusern: Direk van die land gesny – 70% voginhoud. 26% Proteïen – ryk aan vitamiene.

3. Mieliekuilvoer: Gekerf in die sagte deegstadium wanneer die pitte net begin droog word – 63% - 68% vog. 8% Proteïen.

4. Hawer: Groen gesny voor dit in die saad kom – 7% proteïen met ‘n hoë veselinhoud.

5. Mielies word gekoop van plase in die Klipfontein gebied en dan gemaal met ’n hamermeul met ‘n 4 mm sif – 8% Proteïen 82% TVV.

6. HPK: Hoë proteïen konsen traat – bestaande uit Vismeel en Soja oliekoek - hoofsaaklik om die proteïen en minerale sowel as die spoorelemente in die rantsoen te balanseer.

7. Heel kantoensaad word ingesluit – hoofsaaklik as ’n proteïenbron, grootliks ingevoer van Zimbabwe. 26% Proteïen en hoog in energie.

Koeie word in groepe van 200 tot 300 gehou wat beteken dat elke koei 120m² het om vrylik in te beweeg, met ‘n voer blad waar 750-mm voerspasie per koei voorsien is. Faktore wat in aanmerking geneem word wanneer koeie gegroepeer en gevoer word, is die volgende:

1. Melkproduksie per individuele koei – elke dag elektronies met die ALPRO stelsel gemeet. Koeie wat meer as  liter melk lewer – in een voer groep - gevoer met ‘n hoë oktaan rantsoen. Daar is deurlopend sowat 600 koeie in hierdie groep.

2. Koeie met ‘n produksie van tussen 20 en 35 liter per koei per dag in ‘n ander groep. Hulle word minder konsentrate gevoer as die hoë produksie koeie.

3. Lae produksie koeie – lank in laktasie – onder 20 liter per dag, word ‘n lae onderhoudings rantsoen gevoer.

4. Nuwe koeie – 3 tot 50 dae in laktasie en wat in die proses van voorbereiding vir KI is, word die hoë produksie rantsoen gevoer.

5. Verse wat die eerste keer kalf, ongeag wat die produksie, word saam gegroepeer sodat die ouer koeie nie die jongeres karnuffel nie. Hulle kry hoë produksie rantsoen.

6. Hoë somatiese seltelling (SST) koeie word apart gehou. Hierdie koeie se melk word gebruik om die kalwers onder 3 maande te voed. Hulle kry ‘n lae onderhoudingsrantsoen.

7. ‘n 20 kubieke meter dubbel tol Statiese RMH Mengwa word gebruik om al die bestanddele te meng en om die ruvoer in 30-mm tot 50-mm lang stukkies te sny. ‘n 20 kubieke meter self aflaai wa van Landmech gaan voer dan die koeie in hul kampe.

8. Gereelde voeding sessies van so 3 tot 4 per keer dag aan die hoë produksie groepe verseker dat die koeie ‘bietjie-bietjie, kort-kort’ eet. Vars kos stimuleer inname en uiteindelik ook melkproduksie.

9. Die groot voordeel van TMR-voeding in ‘n groep is dat dit die koeie met ‘n beter eetlus en behoefte aan meer kos, toelaat om meer te eet sodat hulle meer kan produseer!

10. TMR-voeding versprei ook die konsentrate oor die hele dag sodat koeie nie te veel konsentrate op ‘n slag eet nie en so maagaandoenings verminder.